యంగ్‌టైగ‌ర్‌ ఎన్టీఆర్‌ కథానాయకుడిగా కొరటాల శివ దర్శకత్వంలో రూపొందిస్తున్న భారీ పాన్ ఇండియా చిత్రం ‘దేవర’ (Devara). జన‌తా గ్యారేజ్ వంటి బ్లాక్ బ‌స్ట‌ర్ త‌ర్వాత వీరిద్ద‌రి కాంబోలో ఈ సినిమా రానుండ‌టంతో భారీ అంచ‌నాలు ఉన్నాయి. ఇక రెండు భాగాలుగా తెరకెక్కిస్తున్న ఈ చిత్రంలో జాన్వీకపూర్‌ కథానాయికగా నటిస్తుండగా, బాలీవుడ్ స్టార్ నటుడు సైఫ్ అలీఖాన్ విల‌న్‌ పాత్రలో కనిపించనున్నారు. ఈ సినిమాను సెప్టెంబ‌ర్ 27న ప్రేక్ష‌కుల ముందుకు తీసుకురానున్న‌ట్లు చిత్ర‌బృందం ప్ర‌క‌టించిన విష‌యం తెలిసిందే. విడుద‌ల తేదీ ద‌గ్గ‌ర ప‌డటంతో వ‌రుస ప్ర‌మోష‌న్స్ చేస్తుంది దేవర టీం. ఇప్ప‌టికే ట్రైల‌ర్‌ను విడుద‌ల చేయ‌గా.. యూట్యూబ్‌లో రికార్డు వ్యూస్‌తో దూసుకుపోతుంది.
ఇదిలావుంటే తాజాగా ఈ చిత్రం సెన్సార్ ప‌నులు పూర్తిచేసుకున్న‌ట్లు తెలుస్తుంది. ఈ సినిమాకు సెన్సార్ బోర్డు స‌భ్యులు యూ/ఏ (U/A) సర్టిఫికెట్‌ జారీ చేసిన‌ట్లు స‌మాచారం. మ‌రోవైపు ఈ సినిమా రన్టైమ్ 2 గంటల 57 నిమిషాల 58 సెకన్ల పాటు ఉండనుంది. ఇక మూవీలో విజువల్స్‌ అద్భుతంగా ఉంటాయని, చివరి 40 నిమిషాలు సినిమాలో హైలైట్ ఉంటుంద‌ని సెన్సార్ బోర్డ్ చెప్పిన‌ట్లు టాక్.
