మన దేశంలో రోజురోజుకు ఆన్‌లైన్ ఆర్డర్లు పెరిగిపోతున్నాయి. గుండుసూది, గుమ్మడికాయ దాకా ప్రతిదీ ఆన్‌లైన్‌లో లభిస్తోంది. అందుకే ఈ రంగంలో అమెజాన్ నుంచి ఫ్లిప్‌కార్ట్ వరకు చాలా కంపెనీలు పోటీ పడుతున్నాయి. ఇన్ని రోజులు ఎలక్ట్రానిక్ గ్యాడ్జెట్స్ ఇతర వస్తువులను, ఫుడ్ వంటి వాటిని డెలివరీ చేసే ఈ కంపెనీలు ఇప్పుడు ఇంటింటికి కిరాణ సరుకులను కూడా డెలివరీ చేస్తున్నాయి. ఈ యాప్స్ సాయంతో మీరు ఇంట్లో బియ్యం, పప్పు, నూనె, ఉప్పు వంటి వాటిని ఎక్కడినుండైనా ఆర్డర్ చేయొచ్చు. ఇలా ఆర్డర్ చేయడమే కాదు వీటి నుంచి క్యాష్ బ్యాక్ కూడా పొందొచ్చు. ఈ సందర్భంగా మీ ఇంటికి చౌకగా కిరాణ సామాగ్రిని అందించే యాప్స్ ఏవి.. ఎందులో ఎక్కువ ఆఫర్లు వస్తున్నాయనే పూర్తి వివరాలను ఇప్పుడు తెలుసుకుందాం...
అమెజాన్..
ఇది ఆన్‌లైన్ ఇ-కామర్స్ ప్లాట్‌ఫారమ్. ఇందులో ఎలక్ట్రానిక్స్ నుంచి దుస్తుల వరకు ఏదైనా ఆర్డర్ చేసుకోవచ్చు. అయితే, ఈ కంపెనీకి అమెజాన్ గ్రాసరీ అనే మరో యాప్ ఉంది. ఇందులో మీరు చాలా తక్కువ ధరకు రోజువారీ సరుకులను, కిరాణ సామాగ్రిని ఆర్డర్ చేయొచ్చు. ఇందులో క్యాష్ ఆన్ డెలివరీతో పాటు UPI ద్వారా లేదా క్రెడిట్ కార్డు చెల్లింపులు చేయొచ్చు. అలాగే ముందుగా కొనుగోలు చేసిన వారికి 100 నుంచి 200 రూపాయల వరకు క్యాష్ బ్యాక్ లభించనుంది.
ఫ్లిప్‌కార్ట్..
మరో ఆన్‌లైన్ ఇ-కామర్స్ ఫ్లిప్ కార్టులోనూ బాస్మతి బియ్యం, వంటనూనె, డిటర్జెంట్ ఐటమ్స్ వంటివన్నీ దొరుకుతున్నాయి. ఇందులో కిరాణ వస్తువుల నుంచి వ్యక్తిగత సంరక్షణకు సంబంధించిన సబ్బులు, షాంపూల వరకు ప్రతిదీ ఆర్డర్ చేయొచ్చు. ఇందులోనూ ఆన్‌లైన్, క్యాష్ ఆన్ డెలివరీ సౌకర్యాలు ఉన్నాయి. డెబిట్-క్రెడిట్ కార్డులు, UPI యాప్స్ కూడా క్యాష్‌బ్యాక్ అందిస్తాయి.
టాటా బిగ్ బాస్కెట్..
టాటా గ్రూప్ యాజమాన్యంలోని బిగ్ బాస్కెట్ నుంచి చౌకగా కిరాణా సామాగ్రిని ఆర్డర్ చేయొచ్చు. ఈ యాప్ ప్రత్యేకత ఏంటంటే.. ఇందులో ఆర్డర్ చేసిన 10 నిమిషాల్లో డెలివరీ చేస్తుందని ఆ కంపెనీ పేర్కొంది. అంటే, ఏదైనా వస్తువులను ఆర్డర్ చేసిన తర్వాత, కేవలం పది నిమిషాల్లో మీ ఇంటి దగ్గరకు వచ్చేస్తుంది. ఇందులోనూ మొదటగా ఆర్డర్ చేసిన వారికి క్యాష్ బ్యాక్, డిస్కౌంట్ లభించనున్నాయి.
Zomato, Blinkit..
ఆన్ లైన్ ఫుడ్ డెలివరీ యాప్ జొమాటో ప్లాట్‌ఫారమ్ బ్లింకిట్. మీకు కూరగాయలు, మసాలా దినుసులు త్వరగా కావాలనుకుంటే ఈ యాప్ లో ట్రై చేయొచ్చు. బియ్యం, పప్పు, నూనె, ఉప్పు, సబ్బు, షాంపూ వరకు అన్నీ అందుబాటులో ఉన్నాయి. ఈ యాప్ లో బుక్ చేసిన 10 నిమిషాల్లోపే డెలివరీ అవుతుందని కంపెనీ పేర్కొంది. ఇందులోనూ క్యాష్ ఆన్ డెలివరీ, UPI పేమెంట్లను చేయొచ్చు.
మరికొన్ని యాప్స్..
పైన పేర్కొన్న నాలుగు యాప్స్ మాత్రమే కాకుండా, ఇటీవల కిరాణా సరుకుల డెలీవరిని ప్రారంభించిన అనేక ఇతర యాప్స్ కూడా ఉన్నాయి. స్విగ్గీ ఇన్ స్టామార్ట్, జియో మార్ట్, Zepto, పొట్లం వంటి యాప్స్ ఎన్నో ఉన్నాయి. ఇక్కడ కూడా వివిధ ఆఫర్లు, క్యాష్ బ్యాక్స్ ఉన్నాయి. వీటిలో రోజువారీ అవసరమైన ఉత్పత్తులను చాలా తక్కువ ధరకే స్మార్ట్‌ఫోన్ నుంచి ఆర్డర్ చేయొచ్చు.
