నీట్‌ గ్రేస్‌ మార్కులు రద్దు! రెండోసారి నీట్‌ యూజీ పరీక్షకు సన్నాహాలు

ఎంబీబీఎస్, బీడీఎస్‌ ప్రవేశాల కోసం నిర్వహించిన నీట్ యూజీ 2024 పరీక్ష వివాదాల్లో చిక్కుకుంది. పరీక్షలో అక్రమాలు చోటు చేసుకున్నట్లు ఆరోపణలు రావడంతో సుప్రీంకోర్టులో పిటీషన్లు దాఖలయ్యాయి. సుప్రీంకోర్టు నోటీసులు జారీ చేసి, వివరణ ఇవ్వాలని కోరింది. దీనిపై కేంద్రం కీలక నిర్ణయం తీసుకుని, 1563 మంది అభ్యర్థులకు ఇచ్చిన గ్రేస్ మార్కులు తొలగించనున్నట్లు ప్రకటించింది. వారి కోసం మళ్లీ పరీక్ష నిర్వహించనున్నట్లు వివరించింది. నీట్ యూజీ 2024 పరీక్ష మే 5న జరిగింది. అయితే మేఘాలయ విద్యార్థులకు తప్పు ప్రశ్నాపత్రాలు అందించారు. ఇన్విజిలేటర్‌కు సమాచారం ఇచ్చిన తర్వాత సరైన ప్రశ్నాపత్రాలు అందజేశారు. వారికి కోల్పోయిన సమయానికి పరిహారంగా గ్రేస్ మార్కులు ఇచ్చారు. ఇది దేశవ్యాప్తంగా ఆరు పరీక్ష కేంద్రాల్లో జరిగింది. ఈ తప్పిదం ర్యాంకుల్లో తేడాలు తీసుకొచ్చింది. నిరసనల తర్వాత, కేంద్రం గ్రేస్ మార్కులు తొలగించి, 1563 మంది విద్యార్థులకు మళ్లీ పరీక్ష నిర్వహించనుంది.