ఫోక్ సింగర్ మంగ్లీ తనదైన పాటలతో ప్రేక్షకుల్లో మంచి క్రేజ్ ను సొంతం చేసుకుంది. మంగ్లీ పాడిన పాటలు వరుసగా హిట్ అవుతుండటంతో తమ సినిమాలో ఖచ్చితంగా ఆమె పాట ఉండేలా దర్శకనిర్మాతలు చూస్తున్నారు. ఈ క్రమంలోనే మంగ్లీ పాడిన ఓ సరికొత్త పాటను "ధూం ధాం" మూవీ మేకర్స్ రిలీజ్ చేశారు.
చేతన్ కృష్ణ, హెబ్బా పటేల్ జంటగా నటిస్తున్న "ధూం ధాం" సినిమాలో ‘మల్లెపూల ట్యాక్సీ’ అనే క్యాచీ సాంగ్ ను మంగ్లీ పాడారు. ఈ పాటకు గోపీ సుందర్ సంగీతం అందించగా, రామజోగయ్య శాస్త్రి లిరిక్స్ అందించారు. కాగా, ఈ సినిమాలో కమెడియన్ వెన్నెల కిషోర్ పెళ్లి సందర్భంలో ఈ పాట రానున్నట్లు తెలుస్తోంది. తాజాగా రిలీజ్ అయిన ఈ పాట ప్రేక్షకులను అమితంగా ఆకట్టుకుంటోంది.
ఇక ఈ సాంగ్ లో మరో విశేషమేమిటంటే, మంగ్లీ ఈ పాటను పాడటమే కాకుండా తెరపై కూడా కనిపిస్తుంది. ఈ సాంగ్ లో ఆమె స్పెషల్ అపియరెన్స్ ఇవ్వడంతో ఆమె ఫ్యాన్స్ ఈ పాటను తెరపై ఎప్పుడెప్పుడు చూద్దామా అని ఆసక్తిగా చూస్తున్నారు. మచ్చ సాయి కిషోర్ తెరక్కించిన ఈ సినిమాను ఎం.ఎస్. రామ్ కుమార్ ప్రొడ్యూస్ చేస్తున్నారు. జూలై నెలలో ఈ సినిమాను థియేటర్లలో రిలీజ్ చేయనున్నట్లు మేకర్స్ వెల్లడించారు.
