దత్తతగా వెళ్లిన వ్యక్తికి పుట్టింటి ఆస్తిలో వాటా ఉంటుందా? చాలా మంది ఉంటుందనే అనుకుంటారు. గతంలోనూ ఇలాంటి కొన్ని కేసుల్లో.. దత్తతగా వెళ్లిన వ్యక్తులకు అనుకూలంగానే తీర్పులు వచ్చాయి. తెలంగాణ హైకోర్టు దీనిపై సుదీర్ఘ విచారణ జరిపి 44 పేజీలతో కూడిన కీలక తీర్పు వెలువరించింది. దత్తగా వెళ్లిన వ్యక్తికి పుట్టింటి ఆస్తిలో వాటా ఉండదని తేల్చి చెప్పింది. ఒకవేళ దత్తతకు ముందు వాటా కేటాయిస్తే, దానిపై మాత్రమే హక్కు ఉంటుందని తెలిపింది. మరి కొన్ని సందర్భాల్లోనూ ఆస్తిలో వాటా ఉంటుందని చెప్పింది. అవేంటో చూడండి..
దత్తతగా వెళ్లిపోయిన తర్వాత పుట్టిన కుటుంబం ఆస్తిలో హక్కులుంటాయా? కీలక ప్రశ్న ఇది. సుదీర్ఘ విచారణ అనంతరం తెలంగాణ హైకోర్టు ఈ అంశంపై కీలక తీర్పు వెలువరించింది. ఇలాంటి సందర్భాల్లో ఉన్న అనుమానాలన్నింటినీ పటాపంచలు చేస్తూ రాష్ట్ర ఉన్నత న్యాయస్థానం స్పష్టమైన తీర్పు ఇచ్చింది. ఖమ్మం జిల్లాకు చెందిన ఓ కేసు విచారణలో హైకోర్టు ధర్మాసనం తీర్పు చెప్పింది. దత్తత వెళ్లిన వ్యక్తికి పుట్టిన కుటుంబానికి చెందిన ఆస్తిలో హక్కులు ఉండవని తేల్చి చెప్పింది. ఒక వ్యక్తి రెండు కుటుంబాల్లో ఉండరని, అలాంటప్పుడు ఆస్తిలో హక్కు కూడా ఒకే కుటుంబంలో ఉంటుందని స్పష్టం చేసింది. ‘యార్లగడ్డ నాయుడమ్మ కేసు’లో ఏపీ హైకోర్టు ఇచ్చిన తీర్పు చట్ట ప్రకారం సరికాదని తెలంగాణ హైకోర్టు పేర్కొంది. మేన్స్‌ హిందూ చట్టం, ముల్లా సూత్రాలతో పాటు పాట్నా హైకోర్టు, అలహాబాద్‌ హైకోర్టు, సుప్రీంకోర్టు తీర్పులను పరిగణనలోకి తీసుకొని ఈ తీర్పు వెలువరించినట్లు తెలిపింది. దత్తతకు ముందు వాటా కేటాయించకపోతే పుట్టిన కుటుంబ ఆస్తిలో హక్కు ఉండదని స్పష్టం చేసింది. ఏమిటీ కేసు?
ఖమ్మం జిల్లా కొణిజెర్ల మండలానికి చెందిన ఎ.వి.ఆర్‌.ఎల్‌. నరసింహారావు కొన్నేళ్ల కిందట దత్తతగా వెళ్లారు. అయినప్పటికీ జన్మించిన కుటుంబం ఆస్తిలో తనకు వాటా ఇవ్వాలని సోదరులను డిమాండ్ చేశారు. ఈ విషయంలో ఖమ్మం సివిల్ కోర్టును ఆశ్రయించారు. దీనిపై విచారించిన ఖమ్మం సివిల్ కోర్టు.. జన్మించిన కుటుంబంలోని ఆస్తిలో ఆయనకు వాటా ఉంటుందంటూ తీర్పు చెప్పింది. ఈ తీర్పును సవాల్‌ చేస్తూ నరసింహారావు సోదరుడు నాగేశ్వరరావు, కుటుంబ సభ్యులు హైకోర్టులో అప్పీలు దాఖలు చేశారు.
నాగేశ్వరరావు దాఖలు చేసిన పిటిషన్‌పై హైకోర్టు న్యాయమూర్తులు జస్టిస్‌ పి. నవీన్‌రావు, జస్టిస్‌ బి. విజయ్‌సేన్‌రెడ్డి, జస్టిస్‌ నగేశ్‌ భీమపాకతో కూడిన ఫుల్‌బెంచ్‌ విచారించింది. ఈ కేసు తీర్పు ప్రభావం కేవలం నాగేశ్వరరావు, నరసింహారావు కుటుంబాలపైనే కాకుండా.. యావత్ సమాజానికి వర్తించే అవకాశం ఉన్న నేపథ్యంలో సుదీర్ఘ విచారణ జరిపి, 44 పేజీలతో కూడిన కీలక తీర్పును తెలంగాణ హైకోర్టు వెలువరించింది ‘ఒకసారి దత్తతకు వెళ్లినప్పుడు పుట్టిన కుటుంబంతో ఉన్న సంబంధాలన్నింటినీ వారు తెంచుకుంటారు. దత్తత తీసుకున్న కొత్త కుటుంబ బంధాలను పొందుతారని చట్టం చెబుతోంది. పుట్టిన కుటుంబంతో ఎలాంటి సంబంధం లేనప్పుడు ఆస్తిలో హక్కు పొందజాలరు’ అని హైకోర్టు ధర్మాసనం పేర్కొంది.
ఎలాంటి ఆస్తులపై హక్కు ఉంటుంది?
ఒక వ్యక్తి దత్తతకు వెళ్లడానికి ముందు అతడి పుట్టింటి ఆస్తుల వాటాలపై చర్చలు జరిగి, వాటా కేటాయించినట్లయితే.. అలాంటి ఆస్తిపై మాత్రమే అతడికి హక్కు ఉంటుందని హైకోర్టు తెలిపింది. దత్తతకు వెళ్లకముందు ఆస్తిలో ఎలాంటి కేటాయింపులు లేకపోతే జన్మించిన కుటుంబానికి చెందిన ఆస్తిలో వాటా ఉండదని స్పష్టం చేసింది.
కోల్‌కతాలోని ‘దాయాభాగ’, తెలుగు రాష్ట్రాల్లో ‘మితాక్షర చట్టం’ ప్రకారం.. ఒక వ్యక్తి పుట్టిన వెంటనే ఉమ్మడి కుటుంబం ఆస్తిలో హక్కు పొందుతాడని ఉన్నప్పటికీ ప్రత్యేకంగా హక్కు పేర్కొనలేదని హైకోర్టు ధర్మాసనం తెలిపింది. దీని ప్రకారం పూర్వీకుల ఆస్తిలో భాగం ఉంటుందని.. అయితే పుట్టిన కుటుంబంలోని వారు సంపాదించిన ఆస్తిలో మాత్రం వాటా ఉండదని స్పష్టం చేసింది..
