‘డెవిల్’ మరో కొత్త స్టోరీతో రాబోతున కళ్యాణ్ రామ్ ..

హీరో నందమూరి కళ్యాణ్ రామ్ వైవిధ్యమైన కథలను ఎంపిక చేసుకుంటూ ముందుకు వెళ్తున్నారు. కొత్త ఐడియాలతో వస్తున్న యువ దర్శకులను ప్రోత్సహిస్తున్నారు. దీనిలో భాగంగానే ‘బింభిసార’ అనే ఫాంటసీ మూవీ చేసి సక్సెస్ కొట్టారు. అయితే, ఈ క్రమంలోనే చేసిన మరో ప్రయోగం ‘అమిగోస్’ పెద్దగా వర్కౌట్ కాలేదు.

కానీ, ఈసారి మాత్రం మరో వైవిధ్యమైన చిత్రాన్ని తెలుగు ప్రేక్షకులకు అందించాలని కళ్యాణ్ రామ్ ఫిక్స్ అయ్యారు. ఆ సినిమానే ‘డెవిల్’. ‘ది బ్రిటిష్ సీక్రెట్ ఏజెంట్’ అనేది ట్యాగ్ లైన్. సంయుక్త మీనన్ హీరోయిన్‌గా నటించారు.ఇప్పటికే విడుదలైన కళ్యాణ్ రామ్ ఫస్ట్ లుక్, టైటిల్ పోస్టర్లు ఆకట్టుకున్నాయి. ఈరోజు కళ్యాణ్ రామ్ పుట్టినరోజు సందర్భంగా ‘డెవిల్’ గ్లింప్స్ విడుదల చేశారు. ఈ టీజర్ సినిమాపై అంచనాలను పెంచుతోంది. టీజర్‌లోని విజువల్స్, నేపథ్య సంగీతం, కళ్యాణ్ రామ్ ప్రజెన్స్, డైలాగ్ డెలివరీ ప్రత్యేక ఆకర్షణగా నిలుస్తు్న్నాయి. ఇండియాకు స్వాతంత్య్రం రావడానికి ముందు జరిగిన కథగా ‘డెవిల్’ను తెరపై ఆవిష్కరిస్తున్నారు. ఇందులో బ్రిటిష్ ప్రభుత్వం తరఫున పనిచేసే సీక్రెట్ ఏజెంట్‌గా కళ్యాణ్ రామ్ కనిపిస్తారు.

‘మనసులో ఉన్న భావన ముఖంలో తెలియకూడదు.. మెదడులో ఉన్న ఆలోచన మాటల్లో బయటపడకూడదు.. అదే గూఢచారికి ఉండవలసిన ముఖ్యమైన లక్షణం’ అంటూ కళ్యాణ్ రామ్ చెప్పే డైలాగ్ టీజర్‌లో హైలైట్‌గా నిలుస్తుంది. ఈ టీజర్‌లో కళ్యాణ్ రామ్ రెండు రకాల వేషధారణలో కనిపిస్తున్నారు. ఒకటి ఇండియన్‌లా పంచె, దానిపై కోటు ధరించడం.. రెండోది యురోపియన్‌లా సూటుబూటు వేసుకోవడం. మొత్తం మీద ‘డెవిల్’ కథలో షేడ్స్, ట్విస్టులు ఉంటాయని టీజర్ చూస్తే అర్థమవుతోంది. ప్రస్తుతం ఈ సినిమా చిత్రీకరణ పూర్తిచేసుకుని పోస్ట్ ప్రొడక్షన్ పనులు జరుపుకుంటోంది. త్వరలోనే విడుదల తేదీని ప్రకటిస్తారు.