ప్రభాస్ హీరోగా, నాగ్ అశ్విన్ దర్శకత్వంలో తెరకెక్కిన 'కల్కి 2898 ఏడి' సినిమా మొదటి రోజే బాక్స్ ఆఫీస్ వద్ద సునామీని సృష్టించింది. అమితాబ్ బచ్చన్, దీపికా పడుకొనే, కమల్ హాసన్ వంటి స్టార్ క్యాస్ట్‌తో ఈ చిత్రాన్ని నిర్మాత అశ్వినీ దత్త ₹600 కోట్ల బడ్జెట్‌తో నిర్మించారు. ప్రీ రిలీజ్ బిజినెస్‌తోనే మంచి వసూళ్లు సాధించిన ఈ చిత్రం విడుదల తర్వాత కూడా అద్భుతమైన కలెక్షన్లు రాబడుతోంది.
మొదటి రోజునే 'కల్కి 2898 ఏడి' దేశవ్యాప్తంగా ₹111 కోట్ల గ్రాస్ కలెక్షన్లు సాధించింది. రెండు తెలుగు రాష్ట్రాల్లో కలిపి ₹67 కోట్లు, కర్ణాటకలో ₹12.5 కోట్లు, తమిళనాడులో ₹5 కోట్లు, కేరళలో ₹3 కోట్లు, హిందీలో ₹24 కోట్లు వసూలు చేసింది. ఓవర్సీస్‌లో ₹40 కోట్లు, మొత్తం ఇతర దేశాలు కలిపి ₹80 కోట్లు వసూలు చేసింది.
రెండవ రోజు కూడా 'కల్కి 2898 ఏడి' కలెక్షన్ల జోరు కొనసాగింది. హైదరాబాద్‌లో 65%, వరంగల్‌లో 60%, వైజాగ్‌లో 58%, కరీంనగర్ 55%, మహబూబ్ నగర్ 83%, కాకినాడ 55% ఆక్యుపెన్సీ నమోదు అయ్యింది.
తెలుగు రాష్ట్రాల్లో రెండవ రోజున కూడా సినిమా ₹35 కోట్ల గ్రాస్ కలెక్షన్లు రాబట్టింది, హిందీలో ₹20 కోట్లు కలెక్షన్లు అందుకుంది. ప్రపంచవ్యాప్తంగా సినిమా కలెక్షన్లు ₹85 నుండి ₹90 కోట్ల వరకు రెండవ రోజు కూడా కొనసాగాయి. మొదటి రోజు ₹191 కోట్లు, రెండవ రోజు ₹90 కోట్ల కలెక్షన్లు సాధించిన ఈ సినిమా రెండు రోజుల్లోనే ₹280 నుండి ₹300 కోట్ల మధ్య వసూళ్లు రాబట్టింది. వారాంతంలో ఈ సినిమా ₹1000 కోట్ల క్లబ్బులో చేరిపోతుందని ట్రేడ్ వర్గాలు సూచిస్తున్నాయి.
మూడు గంటల నిడివి ఉన్నప్పటికీ, ఈ సినిమా కలెక్షన్లపై ఎటువంటి ప్రభావం చూపలేదు. ప్రభాస్ పర్ఫార్మెన్స్, విజువల్ ఎఫెక్ట్స్, భారీ తారాగణం ఈ సినిమాకి పెద్ద ప్లస్ పాయింట్లు. నాగ్ అశ్విన్ స్టోరీ టెల్లింగ్ కూడా ప్రత్యేకంగా నిలిచింది.
