భారత క్రికెట్ జట్టుకు నూతన హెడ్ కోచ్ ఎంపిక కోసం భారత క్రికెట్ నియంత్రణ మండలి (బీసీసీఐ) దరఖాస్తులు ఆహ్వానించిన విషయం తెలిసిందే. ప్రస్తుత కోచ్ రాహుల్ ద్రవిడ్ పదవీకాలం గత వన్డే ప్రపంచకప్‌తోనే ముగిసింది. కానీ బీసీసీఐ అతడి పదవీకాలాన్ని టీ20 ప్రపంచకప్ 2024 వరకు పొడిగించింది. ఈ నేపథ్యంలో మరో నెలరోజుల తర్వాత ద్రవిడ్ హెడ్ కోచ్ పోస్టు నుంచి దిగిపోతాడు.టీమిండియా హెడ్ కోచ్ పదవి కోసం బీసీసీఐ పెద్దలు ఆస్ట్రేలియా మాజీ క్రికెటర్లు జస్టిన్ లాంగర్, రికీ పాంటింగ్, షేన్ వాట్సన్ వంటి వారిని సంప్రదించారని వార్తలు వచ్చాయి. జస్టిన్ లాంగర్ ఇటీవల చేసిన కామెంట్లు ఈ వార్తలు ఊతం ఇచ్చేలా ఉన్నాయి. టీమిండియా హెడ్ కోచ్‌పై తీవ్రస్థాయిలో ఒత్తిడి, రాజకీయాలను ఎదుర్కోవాల్సి ఉంటుందని లాంగర్ వ్యాఖ్యానించాడు. దీంతో బీసీసీఐ అతడి కోచ్ పదవి కోసం సంప్రదించినట్లు సోషల్ మీడియాలో వార్తలు వస్తున్నాయి. అయితే ఈ తరహా వార్తలపై బీసీసీఐ ప్రధన కార్యదర్శి జై షా స్పందించారు. ఆ వార్తల్లో నిజం లేదని కొట్టిపారేశారు.
"నేను (బీసీసీఐ కార్యదర్శి) లేదా బీసీసీఐ ఆఫీస్ బేరర్లు కూడా ఏ ఒక్క ఆస్ట్రేలియా మాజీ క్రికెటర్‌ను సైతం భారత హెడ్ కోచ్ పదవి కోసం సంప్రదించలేదు. వారిని బీసీసీఐ సంప్రదించిందని కొన్ని సెక్షన్లలో వస్తున్న వార్తలు అవాస్తవాలు. ప్రధాన కోచ్ ఎంపిక అనేది ఓ ప్రక్రియ ప్రకారం జరుగుతుంది. సరైన వ్యక్తినే కోచ్‌గా ఎంపిక చేస్తాం. భారత క్రికెట్ స్వరూపాన్ని అర్థం చేసుకున్న వ్యక్తి కోసం తీవ్రంగా ప్రయత్నిస్తున్నాం. వారి నైపుణ్యంతో జట్టును ఉన్నత శిఖరాలకు చేర్చగలిగేవారినే.. ఇందుకు ఎంపిక చేస్తాం. కొత్త కోచ్‌లకు భారత దేశవాళీ క్రికెట్‌పై కూడా అవగాహన ఉండాలి. లేని పక్షంలో వారు ఇబ్బంది పడాల్సి ఉంటుంది. అన్ని విధాలుగా చురుకైన వ్యక్తినే బాధ్యతల్లోకి తీసుకుంటాం" అని జైషా వెల్లడించారు.
భారత క్రికెట్ జట్టు హెడ్ కోచ్ పదవికి దరఖాస్తు చేసుకునేందుకు మే 27 సాయంత్రం 6 గంటల వరకు అవకాశం ఉంది. ఈ హెడ్ కోచ్ పదవి కాలం మూడున్నరేళ్లు ఉంటుందని, 2027 డిసెంబర్ 31 వరకు అతడే కోచ్‌గా కొనసాగుతారు. 60 ఏళ్ల లోపు వయసు ఉన్నవారు ఇందుకు అర్హులు. ఇప్పటివరకు ఎంత మంది? ఎవరెవరు? దరఖాస్తు చేసుకున్నారనే విషయాలపై స్పష్టత లేదు. కానీ బీసీసీఐ మాత్రం గౌతమ్ గంభీర్ లేదా స్టీఫెన్ ఫ్లెమింగ్‌లలో ఒకరికి బాధ్యతలు అప్పగించేందుకు మొగ్గు చూపుతున్నట్లు సమాచారం. చెన్నై సూపర్ కింగ్స్ కోచ్‌గా ఉన్న ఫ్లెమింగ్‌ను ఒప్పించే బాధ్యతలను బీసీసీఐ ఎంఎస్ ధోనీకి అప్పగించినట్లు వార్తలు వస్తున్నాయి.
