ఆంధ్రప్రదేశ్ – తెలంగాణ రాష్ట్ర విభజన జరిగి పదేళ్లు కావస్తోంది. ఆంధ్రప్రదేశ్ పునర్వ్యవస్థీకరణ చట్టం ప్రకారం హైదరాబాద్ పదేళ్లకు ఉమ్మడి రాజధానిగా ఉండాలన్న గడువు జూన్‌ 2, 2024 తో ముగియనుంది. ఈ తేదీ నుంచి హైదరాబాద్ తెలంగాణకు మాత్రమే రాజధానిగా ఉంటుంది. విభజన సమయంలో ఇచ్చిన హామీలు ఇంకా అమలు కాలేదు, ఆస్తుల పంపిణీ పూర్తవ్వలేదు, తద్వారా ఇరు రాష్ట్రాల మధ్య వాదనలు కొత్త రూపం దాల్చాయి.
ఏపీ నేతల డిమాండ్
తెలుగు రాష్ట్రాల మధ్య పెండింగ్‌లో ఉన్న సమస్యల పరిష్కారానికి తెలంగాణ ముఖ్యమంత్రి రేవంత్ రెడ్డి ప్రాధాన్యత ఇవ్వడంతో, హైదరాబాద్‌ను ఉమ్మడి రాజధానిగా కొనసాగించాలని ఏపీ నేతలు కేంద్రంపై ఒత్తిడి చేస్తున్నారు. మాజీ ఐపీఎస్ అధికారి వీవీ లక్ష్మీనారాయణ కేంద్రాన్ని ఒప్పించి 2034 వరకు ఉమ్మడి రాజధానిగా కొనసాగించాలని కోరారు. ఇటీవల, ఏపీ కాంగ్రెస్‌ ఉపాధ్యక్షుడు కొలనుకొండ శివాజీ కూడా అదే డిమాండ్ చేశారు.
సీఎం రేవంత్ కీలక ఆదేశాలు
తెలంగాణ సీఎం రేవంత్ రెడ్డి హైదరాబాద్ ఉమ్మడి రాజధానిగా గడువు ముగియనుండడంతో, తెలంగాణలో ఏపీ ప్రభుత్వ ఆధీనంలో ఉన్న భవనాలను స్వాధీనం చేసుకోవాలని అధికారులను ఆదేశించారు. ఇరు రాష్ట్రాల మధ్య పెండింగ్‌లో ఉన్న ఆస్తుల పంపకాలపై నివేదిక రూపొందించాలని చెప్పారు. ఈ నేపథ్యంలో ఏపీ నాయకులు ఉమ్మడి రాజధానిగా హైదరాబాద్‌ను కొనసాగించాలని డిమాండ్ చేయడం, కేంద్రం నిర్ణయం ఆసక్తిగా మారింది.
