ప్రస్తుతం నగరాల్లో ట్రాఫిక్ సమస్య అతిపెద్ద ఉపధ్రవంగా మారుతోంది. ఆఫీసు వేళల్లో అయితే నరకమే.. ఇక వర్షం పడితే అంతే సంగతులు.. కొద్దిపాటి దూరం ప్రయాణించాలన్నా గంటలు గంటలు సమయం పడుతోంది. ఈ క్రమంలో గాల్లో ఎగిరిపోతే బాగుండు అని అనిపిస్తుంటుంది. అయితే.. ఇప్పుడు ఆ కల నిజమైంది. అమెరికాకు చెందిన లిఫ్ట్‌ ఎయిర్‌క్రాఫ్ట్‌ సంస్థ హెక్సా పేరిట ఒక ఎగిరే కారును రెడీ చేసింది. జపాన్‌లోని టోక్యో కన్వెన్షన్‌ సెంటర్‌లో జరిగిన సాంకేతిక వస్తు ప్రదర్శనలో గాల్లో ఎగిరే 16 రెక్కల కారు ప్రత్యేక ఆకర్షణగా నిలిచింది. ఇది చూడటానికి అతిపెద్ద పెద్ద డ్రోన్ లా కనిపిస్తుంది. కానీ ఈ కారులో కూర్చుని హాయిగా ఎగిరి వెళ్లిపోవచ్చు. పది, పన్నెండు మీటర్ల ఎత్తులో ఈ కారును నడుపుతూ.. అందులో ఉన్న వ్యక్తి అందరికీ అభివాదం చేస్తూ విహరించాడు. భవిష్యత్తు తరాలు పైలెట్‌ అవసరం లేకుండా గాల్లో సులభంగా ప్రయాణించవచ్చని ఈ హెక్సా (Hexa) కారు నిరూపించింది. రాబోయే రోజుల్లో ప్రజల జీవితాలు ఏ స్థాయిలో సాంకేతికమయం కానున్నాయో.. ఈ కన్వెన్షన్‌ సెంటర్‌లో జరిగిన ప్రదర్శన అద్దం పట్టింది.
ఈ ఎగిరే హెక్సా (Hexa) కారు విశేషాలను పరిశీలిస్తే..
ఈ కారు వెడల్పు 4.5 మీటర్లు.. అలాగే ఎత్తు 2.6 మీటర్లు, 196 కిలోల బరువు ఉంటుందని కంపెనీ తెలిపింది. నేల మీద, నీటిలోనూ ల్యాండింగ్ చేయవచ్చని వెల్లడించింది. ఇది గాల్లోకి ఎగిరేందుకు 18 ప్రొపెల్లర్లు ఉన్నాయి. సెకన్ల వ్యవధిలోనే ఎటు కావాలంటే అటు తిరిగేలా అమర్చారు. అంతేకాకుండా.. మనం వీడియో గేమ్ ఆడుకున్నట్టుగా ఒక చిన్న జాయ్ స్టిక్ సాయంతో దీనిని ఆపరేట్ చేయవచ్చు. వినడానికే సూపర్‌గా ఉంది కదా!
ఇక.. ఈ ఎగిరే కారు Hexa ధర చూస్తే.. కేవలం రూ.4.12 కోట్లుగా ఉంటుంది. దీనిని కొనుగోలు చేయాలంటే.. ఇప్పటికిప్పుడు డెలివరీ కుదరదు. ముందుగా ఆర్డర్ ఇచ్చి వెయిట్ చేయాలి. ఆ తర్వాత రెడీ అయ్యాక మీకు అందజేస్తారు. ఇకపోతే.. ఈ కారులో ఒక్కరు తప్ప ఎక్కువ మంది ప్రయాణించడానికి లేదు. ఇది రీచార్జబుల్‌ బ్యాటరీలతో నడుస్తుంది. ఈ కారు గంటకు 100 కిలోమీటర్ల స్పీడ్ తో వెళ్లగలదని కంపెనీ స్పష్టం చేసింది. ముఖ్యంగా.. ఆఫీసులకు వెళ్లే వాళ్లకి ట్రాఫిక్ సమస్యల నుంచి విముక్తి పొందటం కోసం ఈ ఎగిరే కారు మంచిగా పనిచేస్తుంది. దీన్ని బట్టి చూస్తే సమీప భవిష్యత్‌లో ఈ ఫ్లయింగ్ కార్లు గాల్లో దూసుకుపోవడం ఖాయంగా కనిపిస్తోంది.
