జాతీయ స్థాయిలో ఉత్తమ నటుడిగా గుర్తింపు తెచ్చుకున్న మలయాళ నటుడు ఫహాద్ ఫాజిల్‌. తెలుగు ప్రేక్షకులకు కూడా ఫహాద్ పుష్ప సినిమాలో నటించిన భన్వర్ సింగ్ షెకావత్ పాత్ర ద్వారా బాగా చేరువయ్యాడు. ప్రస్తుతం 'పుష్ప 2'లో కూడా ఈ పాత్రకు మరింత ప్రాధాన్యం ఉండనున్నట్లు సమాచారం. ఇటీవలే 'ఆవేశం' సినిమాతో సూపర్ హిట్‌ను తన ఖాతాలో వేసుకున్నాడు.
ఇటీవల ఓ పాఠశాల ప్రారంభోత్సవానికి హాజరైన ఫహాద్.. తనకు ఓ అరుదైన వ్యాధి ఉందని చెప్పి అభిమానులకు షాక్‌ ఇచ్చాడు. కేరళలోని ఒక చిల్డ్ర‌న్ రీహాబిలిటేష‌న్ సెంట‌ర్ ఓపెనింగ్‌కి ముఖ్య అతిథిగా హాజరైన ఫహాద్ తాను ఏడీహెచ్‌డీ వ్యాధి బారిన పడ్డానని తెలిపాడు. ఏడీహెచ్‌డీ అంటే అటెన్ష‌న్ డెఫిసిట్ హైప‌ర్ యాక్టివ్ డిసార్డ‌ర్. ఈ వ్యాధి ఉన్న‌వారిలో ఏకాగ్ర‌త లేక‌పోవ‌డం, హైప‌ర్ యాక్టివ్, హైప‌ర్ ఫోక‌స్ వంటి ల‌క్ష‌ణాలు ఉంటాయ‌న్నాడు.
41 ఏళ్ల వయసులో ఈ అరుదైన వ్యాధి బారిన పడ్డట్లు చెప్పుకొచ్చాడు. చిన్నతనంలోనే బయటప‌డితే న‌యం చేసే అవ‌కాశం ఉండేద‌ని, కానీ తనకు 41 ఏళ్ల వయసులో బయటపడిందని చెప్పారు. తాను జీవితాంతం ఈ వ్యాధితో బాధపడాల్సిందే అని వాపోయారు.
