🗳️ ప్రస్తుతం తెలంగాణ అంతటా ఎన్నికల ఫీవర్‌ నడుస్తోంది. ఎక్కడ చూసినా నాయకుల కటౌట్లు, పార్టీల పోస్టర్లే కనిపిస్తున్నాయి. ఈ ఎన్నికల సమరంలో బీఆర్‌ఎస్‌, కాంగ్రెస్, బీజేపీ ప్రధాన పార్టీలే అయినప్పటికీ చాలా చోట్ల స్వతంత్ర్య అభ్యర్థులు కూడా రంగంలోకి దిగుతున్నారు. 🚗
అలా తెలంగాణ ఎన్నికల్లో ఇండిపెండెంట్‌గా పోటీ చేస్తోన్న అభ్యర్థుల్లో బర్రెలక్క అలియాస్‌ శిరీష కూడా ఒకరు. ప్రస్తుతం తెలంగాణలో ఎక్కడ చూసినా ఈ యువతి పేరే ఎక్కువగా వినిపిస్తోంది. విద్యార్థి సంఘాల నేతలు, నిరుద్యోగులు, రిటైర్డ్‌ ఉద్యోగులు, వివిధ రంగాలకు చెందిన ప్రముఖుల సైతం ఆమెకు మద్ధతు తెలుపుతున్నారు. ఇక సోషల్ మీడియాలోనూ బర్రెలక్క పేరు మార్మోగిపోతోంది. ఇదిలా ఉంటే శిరీష్‌కు బిగ్‌ బాస్‌ రియాల్టి షో నుంచి ఆఫర్ వచ్చిందని, ఓ ఖరీదైన కారు కూడా పంపించారనేని ప్రచారం జరుగుతోంది. తాజాగా ఈ పుకార్లపై శిరీష స్పందించింది. ‘బిగ్‌బాస్‌ వాళ్లు నన్ను ఇప్పటి వరకు సంప్రదించలేదు. బహుశా నా గురించి వారికి తెలియదేమో అనుకుంటున్నాను. వారి దగ్గరి నుంచి నాకు ఎటువంటి ఫోన్ కాల్స్‌, మెసేజులు రాలేదు. అలాగే నాకు ఖరీదైన కారు కొనిచ్చారన్నది పూర్తిగా అవాస్తవం. నేను ఇబ్బంది పడుతున్నా అని అన్నవాళ్లు నడుపుతున్న కార్లు తీసుకొచ్చి ప్రచారానికి వాడుకోమన్నారు. ఒక కారు మాత్రం ఒక అన్న ఉచితంగా ఇచ్చాడు’ అని స్పష్టం చేసింది శిరీష. 💬తద్వారా తనపై వస్తోన్న బిగ్‌ బాస్‌ రూమర్లు వొట్టివేనని కుండ బద్దలు కొట్టేసింది.
