ఆంధ్రప్రదేశ్ ప్రభుత్వం, యువ ఐఏఎస్ అధికారి మైలవరపు వీఆర్ కృష్ణతేజను ఉప ముఖ్యమంత్రి పవన్ కళ్యాణ్ ప్రత్యేక విధుల అధికారి (ఓఎస్‌డీ)గా నియమించింది. ప్రస్తుతం కృష్ణతేజ కేరళలోని త్రిసూర్ జిల్లా కలెక్టర్‌గా పనిచేస్తున్నారు. ఆయన స్వస్థలం పళ్నాడు జిల్లా చిలకలూరిపేట.
సాధారణంగా మంత్రులకు ఆర్‌డీఓ స్థాయి అధికారులను ఓఎస్‌డీలుగా నియమిస్తారు. కానీ పవన్ కళ్యాణ్ కోసం ఐఏఎస్ అధికారి అయిన కృష్ణతేజ నియామకానికి ముఖ్యమంత్రి చంద్రబాబు నాయుడు ప్రత్యేక అనుమతి ఇచ్చారు. కృష్ణతేజను రాష్ట్రానికి డిప్యూటేషన్‌పై పంపాలని కేంద్ర ప్రభుత్వానికి లేఖ రాశారు.
కృష్ణతేజ గతంలో కేరళ పర్యాటకాభివృద్ధి సంస్థ ఎండీ, పర్యాటక శాఖ డైరెక్టర్, ఎస్సీ అభివృద్ధి శాఖ డైరెక్టర్, అలప్పుజ జిల్లా కలెక్టర్‌గా పనిచేశారు. రెండు రోజుల క్రితం సచివాలయంలో పవన్ కళ్యాణ్‌ను కలిశారు.
త్రిసూర్ కలెక్టర్‌గా కృష్ణతేజ అందించిన సేవలకు గాను జాతీయ బాలల రక్షణ కమిషన్ ఆయనను పురస్కారానికి ఎంపిక చేసింది. ఆయన 2015 బ్యాచ్ ఐఏఎస్ అధికారి. 2023 మార్చిలో కలెక్టర్‌గా బాధ్యతలు చేపట్టారు. కరోనా సమయంలో అనాథలుగా మారిన 609 మంది విద్యార్థులను గుర్తించి, దాతల సహకారంతో ఉన్నత చదువులకు చేయూత అందించారు. 35 మంది వితంతువులకు ఇళ్లు నిర్మించి 150 మందికి ఉపాధి అవకాశాలు కల్పించారు. ఆయన అద్భుత పనితీరుతో తనదైన ముద్ర వేస్తున్నారు.
