ఆంధ్రప్రదేశ్ లో నూతన ప్రభుత్వం కొలువుదీరిన సంగతి తెలిసిందే. ఈ క్రమంలో సినిమాటోగ్రఫీ, టూరిజం మంత్రిగా జనసేన నేత, నిడదవోలు ఎమ్మెల్యే కందుల దుర్గేష్ బాధ్యతలు స్వీకరించారు. ఈ సందర్భంగా సినిమా రంగంపై ఆంక్షలు, రెడ్ బుక్ లో అధికారుల పేర్లు, చట్టపరమైన చర్యలు, ఏపీలో టూరిజం అభివృద్ధి మొదలైన అంశాలపై స్పందించారు.
గత ప్రభుత్వ హయాంలో సినిమా ఇండస్ట్రీపై పలు రకాల ఆంక్షలు ఉండేవనే విమర్శలు ఉన్నాయి. ముఖ్యంగా బెనిఫిట్ షోలు, టిక్కెట్ల ధరలు విషయంలో వైఎస్ జగన్ సర్కార్ కాస్త కఠినంగా ఉండేదనే కామెంట్లు వినిపించేవి. అయితే, మంత్రి కందుల దుర్గేష్ ఇకపై అలాంటి ఆంక్షలు ఏమీ ఉండవని స్పష్టం చేశారు. సినిమా రంగం అభివృద్ధికి కృషి చేస్తామని, ఆ రంగానికి లబ్ధి చేకూరుస్తామని తెలిపారు.
అలాగే, ఆంధ్రప్రదేశ్ ని టూరిజం హబ్ గా మారుస్తామని పేర్కొన్నారు. రాష్ట్రంలో ఉన్న పరివాహక ప్రాంతాన్ని ఉపయోగించి టూరిజం అభివృద్ధి చేస్తామని చెప్పారు.
కక్ష సాధింపు చర్యలు చేపట్టమని, మంచి పాలన అందించడమే తమ లక్ష్యమని దుర్గేష్ పేర్కొన్నారు. తాము రెడ్ బుక్ కొనసాగిస్తామని, తప్పు చేసినవారిని చట్టప్రకారం ఉపేక్షించమని హెచ్చరించారు.
తనను గెలిపించిన నిడదవోలుతో పాటు పవన్ కల్యాణ్ పోటీ చేసిన పిఠాపురం నియోజకవర్గం అభివృద్ధికి ప్రత్యేక శ్రద్ధ తీసుకుంటామని దుర్గేష్ చెప్పారు. గతంలో కేవలం బటన్ నొక్కడానికి పరిమితం కావడం వల్ల అభివృద్ధి కుంటిపడిందని పేర్కొన్నారు. వైసీపీ నేతల ఈవీఎం ట్యాపరింగ్ ఆరోపణలపై దుర్గేష్ స్పందిస్తూ, తమ గెలుపుకు కారణం తాము అనుసరించిన విధివిధానాలేనని చెప్పారు. జగన్ చేసిన వ్యాఖ్యలు విడ్డూరంగా ఉన్నాయని, ఈవీఎంలపై నమ్మకం లేకపోవడం ప్రజాస్వామ్యంపై నమ్మకం లేకపోవడమే అని పేర్కొన్నారు.
댓글